Coñece os catro quilómetros de carreira entre pontes, carballos, ermidas, subidas e baixadas.

CARREIRA ABSOLUTA (CATEGORÍAS C, D, E, F)

Consulta a ruta e descárgaa en formato GPX:

A do Gundián é unha carreira popular de percorrido curto pero esixente, que transcorre polas dúas beiras do río Ulla, entre as provincias da Coruña e Pontevedra. A proba arranca na ponte vella, unha construción de finais do XVIII pola que pasaba no seu día o viño de Ribeiro camiño de Santiago e que hoxe empregan os peregrinos que seguen a Vía da Prata.

O primeiro quilómetro da carreira leva ata a ermida do Gundián nunha subida case constante, cun par de ramplas de desnivel acusado. Logo de pasar a ermida, a pendente suavízase ata chegar á ponte do tren, unha construción de cemento forxado construída sobre as ladeiras escarpadas do punto máis estreito polo que cruzar o río, unha paraxe chea de historia e de lendas. Se os folgos o permiten, desde a ponte pódese gozar dunhas vistas espectaculares sobre o val do Ulla.

Ao pasar a vía comezamos o descenso e, pouco despois de cruzar baixo o novo viaduto do tren, alcanzamos o segundo quilómetro de percorrido. A partir de aí a baixada é máis pronunciada, atravesando os lugares de San Xoán da Cova e Figueiredo ata chegar á Rúa da Ponte Ulla. O quilómetro 3 atópase á altura do punto de partida, convertido en zona de abituallamento.

Queda daquela un só quilómetro, o máis duro: volver subir á ermida do Gundián polo mesmo camiño que no primeiro quilómetro. As costas tiran, pero a recompensa agarda no alto: a meta está instalada no medio da romaría. Aos corredores e corredoras agárdanos a música e o colorido dun día de festa.

CATEGORÍA B (9 A 12 ANOS)

Consulta a ruta e descárgaa en formato GPX:

Para os e as atletas nados entre o 2005 e o 2008 a carreira ten unha lonxitude de 1 quilómetro. A saída está na ponte vella e a meta na ermida do Gundián, polo que é un percorrido curto pero con moito desnivel e ramplas moi duras.

CATEGORÍA A (4 A 8 ANOS)

Consulta a ruta e descárgaa en formato GPX:

Os corredores e as corredoras nacidos entre o 209 e o 2012 teñen que cubrir unha distancia de 500 metros. A saída atópase xusto despois da rampla máis difícil, pero aínda terán que sortear varias subidas para chegar á meta, situada na ermida de Gundián.

CATEGORÍA A ESPECIAL (ATÉ 4 ANOS)

Consulta a ruta e descárgaa en formato GPX:

Os máis cativos tamén poden participar nesta carreira popular. O reto dos nacidos entre 2013 e 2017 é completar case 200 metros sen despistarse cos berros de ánimo de pais, nais e demais parentes e en sucumbir á tentación de parar antes da meta nos postos de rosquillas, xoguetes e gominolas.